काठमाडौं– उपचाररत प्रधानमन्त्री केपी शर्मा ओली आज अपस्तालबाट डिस्चार्ज हुने भएका छन् ।
प्रधानमन्त्री ओलीको स्वास्थ्य अवस्था बुझ्न धापासीस्थित ग्राण्डी अस्पताल पुगेका नेपाल कम्युनिस्ट पार्टी (नेकपा) अध्यक्ष पुष्पकमल दाहाल (प्रचण्ड) ले प्रधानमन्त्री आज डिस्चार्ज हुने जानकारी दिएका हुन् ।
प्रधानमन्त्रीसँग एक घण्टाभन्दा बढी समय भेट गरेका प्रचण्डले अहिले प्रधानमन्त्रीको स्वास्थ्य अवस्था सुधारोन्मुख रहेको जानकारी दिए ।
उनका अनुसार प्रधानमन्त्रीको मिर्गौलाको हिजो र आज गरी दुई पटक डायलासिस गरिएको छ । थप डायलासिस गर्नु पर्ने वा नपर्ने भन्नबारे अहिले नै चिकित्सकहरुले नबताएको जानकारी दिए । उनले भने, ‘अवस्था हेरेर गर्नु पर्ने पनि हुन सक्ने चिकित्सकले बताएका छन् ।’
डायलासिसपछि प्रधानमन्त्रीको स्वास्थ्य अवस्था सामान्य रहेकाले केही समय आराम गरेर उनी बालुवाटार फर्किने अध्यक्ष प्रचण्डले जानकारी दिए ।
स्वास्थ्यमा समस्या आएपछि प्रधानमन्त्री ओली हिजो (बुधबार) बिहान ९ बजे ग्राण्डी अस्पताल पुगेका थिए ।
