पर्वत, ९ असार : पर्वतको फलेवास नगरपालिकाले आगामी आर्थिक वर्ष वि.सं. २०८३/०८४ का लागि रु.६९ करोड तीन लाख १२ हजार रुपैयाँको बजेट सार्वजनिक गरेको छ ।

मंगलवार सम्पन्न नगरपालिकाको १८ औँ नगरसभामा उपप्रमुख शोभाकुमारी क्षेत्रीले बजेट प्रस्तुत गर्नुभएको हो । प्रस्तुत बजेटमध्ये चालुतर्फ रु. ५४ करोड ८९ लाख दुई हजार रुपैयाँ अर्थात् ७९.५२ प्रतिशत र पुँजीगततर्फ रु.१४ करोड १४ लाख १० हजार रुपैयाँ अर्थात् २०.४८ प्रतिशत विनियोजन गरिएको छ ।

नगरपालिकाले कृषि, पशुपालन, शिक्षा, स्वास्थ्य, पूर्वाधार विकास तथा रोजगारी सिर्जनालाई बजेटको मुख्य प्राथमिकतामा राखेको जनाएको छ । आर्थिक विकासतर्फ रु.तीन करोड ५३ लाख रुपैयाँ विनियोजन गरिएको छ । जसमा कृषि क्षेत्रका लागि रु.एक करोड ४५ लाख, पशुपन्छी विकासका लागि रु.५७ लाख, पर्यटन प्रवद्र्धनका लागि रु.५४ लाख तथा उद्योग र रोजगारी कार्यक्रमका लागि छुट्टाछुट्टै रु.१६/१६ लाख रुपैयाँ विनियोजन गरिएको उपप्रमुख शोभा कुमारी क्षेत्रीले जानकारी दिनुभयो ।

यसैगरी कृषि उत्पादन वृद्धि, यान्त्रिकीकरण, सिँचाइ विस्तार तथा कृषि उपजको बजारीकरणका लागि विशेष कार्यक्रम सञ्चालन गरिने भएको छ । कृषि यान्त्रिकीकरणका लागि रु.४० लाख तथा साना सिँचाइ कार्यक्रमका लागि रु.६५ लाख ३५ हजार रुपैयाँ विनियोजन गरिएको छ ।

सामाजिक विकासतर्फ सबैभन्दा बढी रु.४० करोड ७४ लाख रुपैयाँ विनियोजन गरिएको छ । यसमध्ये शिक्षाका लागि रु.३२ करोड २९ लाख र स्वास्थ्य क्षेत्रका लागि रु.सात करोड २३ लाख रुपैयाँ छुट्याइएको छ । विद्यालयमा दिवा खाजा, छात्रवृत्ति, निःशुल्क पाठ्यपुस्तक, शैक्षिक गुणस्तर सुधार तथा स्वास्थ्य संस्थाको सुदृढीकरणका कार्यक्रम सञ्चालन गरिने जनाइएको छ ।

पूर्वाधार विकासतर्फ रु.१४ करोड १४ लाख १० हजार रुपैयाँ विनियोजन गरिएको छ । सडक स्तरोन्नति, खानेपानी, सिँचाइ, वडा कार्यालय भवन निर्माण तथा कृषि पूर्वाधार विकासका कार्यक्रमलाई निरन्तरता दिइएको नगरपालिकाले जनाएको छ ।

नगरपालिकाले कृषि तथा पशुपालनलाई व्यवसायीकरण गर्दै दूध, मासु, फलफूल, तरकारी र खाद्यान्नमा आत्मनिर्भर बन्ने लक्ष्य लिएको जनाएको नगरप्रमुख गंगाधर तिवारीले जानकारी दिनुभयो । स्थानीय स्रोतसाधनको अधिकतम उपयोग, रोजगारी सिर्जना, गरिबी न्यूनीकरण र सुशासन प्रवद्र्धनलाई पनि बजेटले प्राथमिकता दिएको उहाँको भनाई छ ।

नगरसभामा आगामी आर्थिक वर्षको नीति तथा कार्यक्रम प्रस्तुत गर्दै नगरप्रमुख तिवारीले “कृषि, पर्यटन, जलस्रोत र पूर्वाधार : फलेवासीको समृद्धिको आधार” भन्ने मूल नारालाई अघि सार्नुभएको छ ।

सुशासन, सेवा प्रवाहको सरलीकरण, डिजिटल प्रविधिको प्रयोग तथा नागरिकमैत्री प्रशासनलाई विशेष प्राथमिकता दिइएको छ । नगर तथा वडा कार्यालयबाट प्रदान गरिने सेवालाई थप प्रभावकारी बनाउन डिजिटल नागरिक वडापत्र, अनलाइन सेवा, सामाजिक परीक्षण र सार्वजनिक सुनुवाइलाई संस्थागत गरिने उल्लेख गरिएको छ ।

पूर्वाधार विकासतर्फ सबै बस्तीमा बाह्रै महिना सञ्चालन हुने सडक सञ्जाल विस्तार, कालोपत्रे सडक निर्माण, वडा कार्यालय भवन, खानेपानी तथा सिँचाइ आयोजनालाई निरन्तरता दिइने भएको छ ।
पर्यटन क्षेत्रलाई आर्थिक समृद्धिको प्रमुख आधारका रूपमा अघि बढाइएको छ । मोदिबेणी, डहरे, चिसापानी, पुर्कोट, सातमुले बराह क्षेत्रलगायत धार्मिक, ऐतिहासिक तथा प्राकृतिक सम्पदाको संरक्षण र प्रवद्र्धन गरिने भएको छ । केबलकार, पदमार्ग, होमस्टे तथा एग्रो–टुरिजमको सम्भाव्यता अध्ययन गरी पर्यटन पूर्वाधार विस्तार गर्ने नीति लिइएको नगरप्रमुख तिवारीले बताउनुभयो ।

कृषि क्षेत्रलाई व्यावसायिक, यान्त्रिकीकरण र बजारमुखी बनाउने नीति अवलम्बन गरिएको उहाँले बताउनुभयो । मकै, धान, फलफूल, अलैँची, अदुवा, कफी, चिया तथा जडीबुटी उत्पादन प्रवद्र्धन, किसान वर्गीकरण, मौरीपालन, सिँचाइ विस्तार तथा बाँझो जमिनको उपयोगलाई प्राथमिकता दिइएको उहाँको भनाई छ ।

स्वास्थ्य क्षेत्रतर्फ नगर अस्पताल सञ्चालन, स्वास्थ्य बीमाको पहुँच विस्तार, ज्येष्ठ नागरिकको घरमै स्वास्थ्य परीक्षण, निःशुल्क औषधि वितरण तथा मातृ–शिशु स्वास्थ्य सेवाको सुदृढीकरणलाई प्राथमिकता दिइएको छ । सबै नागरिकलाई गुणस्तरीय स्वास्थ्य सेवाको पहुँच सुनिश्चित गर्ने लक्ष्य राखिएको छ ।