पर्वत, पातिचौर — मोदी गाउँपालिकाले चालु आर्थिक वर्ष २०८२/०८३ का लागि “पढ्दै कमाउँदै, सिक्दै रमाउँदै” कार्यक्रम सञ्चालन गर्ने भएको छ। गाउँकार्यपालिकाको कार्यालय, पातिचौरले एक सूचना जारी गर्दै उक्त कार्यक्रम कार्यान्वयनका लागि आवेदन आह्वान गरेको हो।
सूचनाअनुसार विद्यालयस्तरमा कृषि शिक्षामार्फत सिकाइसँगै आम्दानी जोड्ने उद्देश्यले कार्यक्रम सञ्चालन गर्न लागिएको हो। यस कार्यक्रमअन्तर्गत विद्यालयमा स्थायी प्लास्टिक टनेल निर्माण तथा कार्यक्रम निरन्तरता सम्बन्धी गतिविधिहरू समावेश गरिएका छन्।
कार्यक्रम विवरणअनुसार स्थायी प्लास्टिक टनेल निर्माणका लागि ३ लाख रुपैयाँ बजेट विनियोजन गरिएको छ भने कार्यक्रम निरन्तरताका लागि २ लाख रुपैयाँ बजेट छुट्याइएको छ। कार्यक्रमबाट ६ वटा विद्यालय लाभान्वित हुने लक्ष्य लिइएको छ। गएका आर्थिक वर्षमा कार्यक्रम सञ्चालन गरिसकेका विद्यालयहरूका लागि यो निरन्तरता कार्यक्रम लागू हुनेछ।
कार्यक्रम सञ्चालन गर्न इच्छुक विद्यालयहरूले सूचना प्रकाशित भएको मितिले १५ दिनभित्र आवश्यक कागजातसहित कृषि विकास उपशाखा, मोदी गाउँपालिकामा आवेदन पेश गर्नुपर्नेछ। आवश्यक कागजातमा कार्यक्रम सञ्चालन गर्ने जग्गाको लालपुर्जाको प्रतिलिपि, सम्बन्धित वडा कार्यालयको सिफारिस, विद्यालय व्यवस्थापन समितिको निर्णय, १० प्रतिशत लागत साझेदारी तथा निरन्तरता कायम गर्ने प्रतिबद्धता पत्र लगायत समावेश छन्।
गाउँपालिकाले यस कार्यक्रममार्फत विद्यार्थीलाई व्यवहारिक कृषि ज्ञान, सीप विकास तथा आम्दानीसँग जोड्ने लक्ष्य राखेको जनाएको छ। थप जानकारीका लागि सम्बन्धित वडा कार्यालय, शिक्षा युवा तथा खेलकुद विकास उपशाखा वा सूचना प्रविधि उपशाखामा सम्पर्क गर्न सकिने जनाइएको छ।
