नयाँ दिल्ली — भारतको हिमाचल राज्यमा रुखले किच्दा दुई जना नेपालीको मृत्यु भएको छ ।
हिमाचलको नारकन्दा जिल्लामा विगत दुई दिनदेखि भएको वर्षाले रुख ढलेर घाइते सात जना नेपालीमध्ये २ को मृत्यु भएको हो । उनीहरू सबैजना मजदुरी गर्दै आएका थिए ।
मृत्यु हुनेमा बाँके विनाउना चिलहरियाका सन्तबहादुर पुन मगर र अर्जुन बुढा मगर रहेका छन् । घाइतेहरुमा भीमबहादुर, कृष्ण, रणवीर, रमन, समीर छन्। घाइतेहरु सबै राप्तिसोनारी गाउँपालिका-४ का बासिन्दा हुन् ।
उनीहरूको अवस्था चिन्ताजनक रहेको बताइएको छ। उनीहरू बस्दै आएको घरमाथि आइतबार बिहान रुख ढलेको थियो। घाइतेहरुलाई तत्कालै सीमलाको इन्दिरा गान्धी मेडिकल कलेज लगिएको थियो ।
