सचिवालय बैठकले हालै गरेको निर्णयबारे सोमबार हेटौंडास्थित प्रदेश नम्बर ३ मुख्यमन्त्री निवासमा प्रचण्डले भने,‘पार्टीमा अलि बढी ध्यान र जोड मैले दिने, सरकारमा अर्को अध्यक्षले दिने भन्ने निर्णय गरिएको हो।’
यही सरकार पाँच वर्ष चल्ने बताएका प्रचण्डले सचिवालय बैठक गर्नुअघिसम्म मान्छेहरूलाई के हो के हो सरकार भन्नेजस्तो लाग्ने गरेकोले ढुक्क भएर सरकार र पार्टीका काम गर्न सचिवालय बैठकले निर्णय गर्नुपरेको बताए।
केही दिनअघि बसेको नेकपा सचिवालय बैठकले प्रचण्डलाई कार्यकारी अध्यक्ष बनाउने र वरियता क्रम भने पहिलेजस्तै अध्यक्ष ओलीलाई निरन्तरता दिने निर्णय गरेको थियो।
उक्त निर्णय गर्नुका पछाडि सरकार र पार्टीलाई राम्रोसँग सञ्चालन गर्नु रहेको प्रचण्डले प्रष्ट पारेका हुन्।
‘ढुक्कसँग सरकार र पार्टी पनि राम्रोसँग चलाऔं भनेरै निर्णय गरेका हौं,’ उनले भने, ‘म अलि बढी नै पार्टीका काममा लागिपरेको छु। देशभरि दौडिराखेको छु।’
देशभर पार्टी कार्यकर्ता, जनता भेट्दा उत्साह पाएको प्रचण्डले बताए।
सरकार र नेकपाप्रति आस्था, विश्वास र भरोसा रहेको पनि उनको भनाइ छ।
‘जनता निराश छैनन्। देशभरि घुम्दा परिवर्तनप्रति भरोसा छ,’ उनले भने, ‘नेतृत्वले ठीक समयमा ठीक गर्यो गरेन बरू आत्मसमीक्षा गरेर अघि बढ्दा झन् राम्रो हुन्छ। जनता भनेको त सूक्ष्मदर्शक यन्त्र हो। जनताले सरकारको काम हेरिराखेका हुन्छन्।’
प्रचण्डले चिनियाँ राष्ट्रपति सी चिनफिङको नेपाल भ्रमणले नयाँ सन्देश गएको पनि बताए।
देशमा राजनीतिक स्थिरता आएको भन्दै उनले विकास निर्माणमा सबै एकजुट भएर लाग्नुपर्नेमा जोड दिए।
‘नेपालमा विकासको गति तीव्र हुनेवाला छ। भारत र चीन छिमेकी भएर मात्र होइन हाम्रो प्राकृतिक र मानवीय स्रोत साधनको दृष्टिले पनि विकासले छिटो गति लिन्छ,’ उनले भने। प्रदेश नम्बर ३ को राजधानी र नाम छिटो तोक्नुपर्ने प्रचण्डले बताए।
‘नाम र राजधानी केही दिनभित्र तोक्नुपर्छ,’ उनले भने।
