यसरी निर्माण हुँदै छ पर्वतको ठानामौलामा एकीकृत नमुना बस्ती - News site from Nepal
यसरी निर्माण हुँदै छ पर्वतको ठानामौलामा एकीकृत नमुना बस्ती

पर्वत– भुकम्पका कारण जोखिममा परेको पर्वतको फलेवास नगरपालिका वडा न ८ ठानामौला स्थित अर्चलेको दलित परिवारका लागि एकीकृत बस्ती निर्माण गर्न थालिएको छ ।
सोहि वडाको छतिवन टारीमा स्थानान्तरण गर्नेगरी एकिकृत बस्ती निर्माण शुरु गरिएको हो । राष्ट्रिय पूननिर्माण प्राधिकरणको सहयोगमा अर्चलेका २० घरलाई नजिकै छतिवन टारीमा एकिकृत बस्ती निर्माण गरि स्थानान्तरण गर्न लागिएको जिल्ला आयोजना कार्यान्वयन ईकाई पर्वतले जनाएको छ ।
एकीकृत बस्तीको शुक्रवार फलेवास नगरपालिकाका नगप्रमुख पदमपाणी शर्माले शिलन्यास गर्नुभएको छ । सो अवसरमा बोल्दै नगरप्रमुख शर्माले जोखिममा रहेका परिवारलाई एकीकृत बस्ती बनाएर सुरक्षित ठाउँमा राख्न लागिएको बताउँदै बस्तीसँगै अन्य अवसरहरु पनि प्रदान गर्नका लागि नगरपालिकाले सहयोग गर्ने बताउनुभयो । शर्माले उपभोक्ता समितिलाई तोकिएकै समयमा निर्माण सम्पन्न गर्न पनि आग्रह गर्नुभएको छ । उहाँले गण्डकी प्रदेशमै एकीकृत बस्तीको थालनी फलेवास बाट गरिएको बताउँदै नगरभित्रका छरिएर रहेका अन्य बस्तीहरुलाई पनि एकीकृत गर्ने प्रयास भैरहेको बताउनुभयो । शर्माले बस्ती विकास कार्यक्रम अन्तर्गत आगामी पाँच वर्ष भित्रमा नगरका विभिन्न स्थानमा एकीकृत बस्तीहरु निर्माण हुने बताए । उनले फलेवासका नागरिकहरुको समृद्धिका लागि नगरपालिकाले रचनात्मक कामहरु अघि बढाएको बताउँदै व्यावसायिक कर्ममा लाग्न आग्रह गर्नुभयो । बाँझिँदै गएको खेतवारीमा खेती लगाएर प्रसस्त आम्दानी गर्न सकिने भन्दै शर्माले व्यावसायिक दृष्टिकोण भएका युवाहरुलाई नगरपालिकाले जस्तोसुकै सहयोग गर्न पनि तयार रहेको बताउनुभयो ।

कार्यक्रममा फलेवास नगरपालिकाका उपप्रमुख मञ्जु अधिकारीले एकीकृत बस्ती समयमै निर्माण सम्पन्न गर्न आग्रह गर्दै बस्तीको बिकास र बस्तीमा बस्ने नागरिकहरुको आयआर्जन लगायत आर्थिक विकासका लागि नगरपालिकाले रचनात्मक कार्यक्रमहरु संचालन गर्ने आश्वासन दिनुभयो । उहाँले उक्त बस्तीका लागि आवश्यक खानेपानी, विद्युत, सिंचाई, सडक निर्माणका लागि पहल गर्ने बताउनुभयो ।
प्रमुख जिल्ला अधिकारी गुरुदत्त ढकालले जोखिममा रहेको उक्त बस्तीलाई स्थानान्तरण गराउनका लागि आफु पर्वतमा आएदेखिनै पहल गर्दै आएको बताउँदै पूर्वाधार निर्माण र बस्तीका लागि चाहिने अन्य सेवा सुविधा उपलव्ध गराउन पहल गर्ने बताउनुभयो ।
सामुहिक जमिन खरिद गरेर एकिकृत आवास बनाउने प्रकृया शुरु भएपछि बस्ती निर्माणका लागि लाभग्राहिहरुकै सहभागितामा उपभोक्ता समिति गठन गरिएको छ । उपभोक्ता समितिले निर्माणको काम शुरु गरेको स्थानीय अगुवा डिलबहादुर विकले जानकारी दिनुभयो । सो अवसरमा विकले एकीकृत बस्तीका बारेमा जानकारी गराउनुभएको थियो । कार्यक्रमको संचालन फलेवास नगरपालिकाका नगरप्रमुख पदमपाणी शर्माका सल्लाहाकार देविप्रसाद तिमिल्सिनाले गर्नुभएको थियो ।

प्रतिक्रिया

सम्बन्धित समाचार

© 2021 लोकतन्त्र अनलाईन All right reserved
Site By : Softnagari
error: Content is protected !!