डा. अनिता श्रेष्ठ
पाङको चौरमा हाँसेकी थिइन् पार्वती,
निशब्द खेलाइ रहेकी सपनाहरूको झुल्का।
शिव प्राप्तिको चाहनाले,
गुप्तेश्वरको गर्भगुफामा चलेको थियो
एक मौन तपस्या।
कुशमामा चिनिएको छ एक दिव्य चिन्ह,
जहाँ जन्मिएको हो कुश—ऋषिहरूको पूजा,
कर्म र योगको प्रतिक।
त्यसैले त उर्जा यहाँ उच्च छ,
धरा, गगन र आत्मालाई छुने ऊर्जा।
सहस्रधारामा नुहाएकी पार्वतीको स्मृति
आज पनि बगिरहेछ जलधारासँगै,
प्रकृतिको कान्तिलाई जोगाइरहेछ
शिवशक्तिको मौन संवादमा।
पर्वत, तिमी केवल भूगोल हैनौ,
तिमी इतिहास हौ,
तिमी ऊर्जा हौ,
र तिमी साक्षी हौ—
ईश्वर र मानवबीचको प्रेम र तपस्याको।
दोलखा
