ओली–प्रचण्ड वार्ता सकियो, आज पनि सहमति जुटेन - News site from Nepal
ओली–प्रचण्ड वार्ता सकियो, आज पनि सहमति जुटेन

काठमाडौँ – सत्तारुढ नेपाल कम्युनिस्ट पार्टी नेकपाका दुई अध्यक्ष केपी शर्मा ओली र पुष्पकमल दाहाल प्रचण्डबीचको वानटुवान वार्ता सकिएको छ । दुई अध्यक्षबीच बालुवाटारमा झण्डै डेढघण्टा छलफल चलेको थियो ।

उनीहरुबीच केपी ओलीले पार्टी अध्यक्ष र प्रधानमन्त्री दुवै पदबाट राजीनामा दिने विषयमा छलफल केन्द्रित रहेको बताइएपनि के सहमति भयो भन्ने खुलेको छैन् । आजको वार्ता निर्णायक बनाउने अध्यक्षद्वयले यसअघि बताए पनि कुनै सहमति जुटेको छैन् । तर नेताहरुले वार्ता सकारात्मक भएको बताएका छन् ।

ओली निकट निकटका एक नेताले भने, ‘छलफल झण्डै डेढ घण्टा चलेको थियो । ठोस कुनै सहमति भएको छैन् । तर वार्ता सकारात्मक रुपमा अघि बढेको छ । कुनै सहमति नजुटे पनि एक अर्काको प्रस्ताव र संवादलाई अघि बढाउने सहमति भएको छ । फेरि वानटुवान वार्ता हुनेछ ।’

नेकपाका अध्यक्ष प्रचण्डको निकटका अर्का नेताले भने, ‘दुई अध्यक्षका बीचमा गम्भीर ढंगले छलफल गर्ने सहमति भएको छ । अब छलफलको वातावरण बन्दै गएको छ। वार्तामा अध्यक्ष प्रचण्डले कुनै कार्यदल नबनाइ दुई जनाकै बीचमा छलफल गर्न जरूरी रहेको बताउनुभएको थियो ।’

प्रचण्डको भनाई उदृत गर्दै ती नेताले भने, ‘हामी दुई जनामात्रै बस्न जरूरी छ। अरू यताउति नगरिकन हामीमात्रै बसौं भनेर अध्यक्षले भन्नुभएको छ। प्रधानमन्त्रीबाट ठोस कुरा केही नआएको भए पनि छलफल, छलफलजस्तो भएको छ।’

यसअघि दोस्रो तहका नेताहरुसहित बैठक बसेका ओली र दाहालबीच सोमबार एक्ला एक्लै छलफल चलेको हो ।

प्रधानमन्त्री समेत रहेका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्ड तथा वरिष्ठ नेता माधवकुमार नेपाल समूहको शक्ति संघर्षले नेकपा लगभग विभाजनको विन्दुमा पुगेको देखिएको छ ।

समस्या समाधानका लागि दुई अध्यक्षबिच अहिलेसम्म भएका वार्तामा कुनै सकारात्मक संकेत देखिएको छैन । सोमबारको छलफलमा कस्तो प्रगति भयो भन्ने खुलेको छैन ।

ओलीले दुवै पदबाट राजीनामा दिनु पर्ने प्रचण्ड–नेपाल समूहको माग तथा कुनै पनि पद नछोड्ने ओलीको अडानका कारण अहिलेसम्म सहमतिको सम्भावना देखिएको छैन । तर पार्टीका दोस्रो तहका नेताहरु सहमतिका लागि प्रयासरत रहेको बताउँछन् ।

प्रतिक्रिया

सम्बन्धित समाचार

© 2020 लोकतन्त्र अनलाईन All right reserved
Site By : Softnagari