काठमाडौं– सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले सोमबार(आज) सचिवालय बैठक बोलाएका छन् ।
पार्टी एकताको १५ महिनापछि पहिलोपटक प्रचण्डको अध्यक्षतामा आज सचिवालय बैठक बस्न लागेको हो । बैठक दिउँसो १ बजे पार्टी कार्यालय धुम्बाराहीमा बस्नेछ । बैठकमा पार्टी एकताको बाँकी काम टुंगो लगाउने, टुंगो लागेका कमिटीलाई सक्रिय बनाउने र जागरण अभियानको विषयमा छललफल गरिने एजेण्डा राखिएको नेकपा सचिवालय सदस्य एवं प्रवक्ता नारायणकाजी श्रेष्ठ बताए ।
स्वास्थ्य उपचारका लागि प्रधानमन्त्री तथा अध्यक्ष केपी शर्मा ओली सिङ्गापुर रहेकाले पहिलो पटक एक अध्यक्षको अनुपस्थितमा अर्का अध्यक्षको अध्यक्षतामा बैठक बस्न लागेको हो ।
आन्तरिक पार्टी विवाद मिलाउने उद्देश्यले बैठक बोलाइएको बुझिएको छ । गत बिहीबारको सचिवालय बैठकमा ओली र अर्का बरिष्ठ नेता माधवकुमार नेपालबिच व्यक्तिगत तहमा भनाभन भएपछि नेकपा भित्रको बिबाद थप उत्कर्षमा पुगेको छ । अध्यक्ष दाहालले वरिष्ठ नेता माधवकुमार नेपालसँग समेत छलफल गर्दै सचिवालय बैठक बोलाएका हुन् ।