पर्वत प्रशासनले फेरी राम्जादेउरालीमा शिविर संचालन गर्ने - News site from Nepal

पर्वत–बिभिन्न कारणले समयमै नागरिकताको प्रमाण पत्र लिन नसकेकाहरुका लागि शिविर संचालन गर्दै आईरहेको जिल्ला प्रशासन कार्यालय पर्वतले जिल्लाको मोदी गाउँपालिका ७ राम्जामा शिविर संचालन गर्ने भएको छ ।

बृद्ध र अपांगता भएकाहरुलाई सदरमुकाम कुश्मामा आएर नागरिकताको प्रमाणपत्र लिन कठिन भएका कारण घुम्ती टोली मार्पmत शिविर संचालन गर्न लागिएको प्रमुख जिल्ला अधिकारी गुरुदत्त ढकालले जानकारी दिनुभयो । राम्जामा यही पुषको २६ गते बिहीबार १ दिनको लागि शिविर राखिएको हो । राम्जामा केन्द्र राखेर सेवा प्रवाह गर्दा राम्जा सहित मोदी गाउँपालिका ८ चित्रे र कुश्मा नगरपालिका ११ पकुवाका नागरिकहरुलाई सजिलो हुने प्रशासनको भनाई छ । शिविरमा नयाँ नागरिकताको प्रमाण पत्र बनाउनुको साथै हराएकाहरुको प्रतिलिपि पत्र, पेन्सन सिफारिस, दलित र जनजाति प्रमाणित पनि गरिने छ ।

उक्त शिविरमा जिल्ला निर्वाचन कार्यालय पर्वतको टोली पनि समावेश गरिने भएको छ । निर्वाचन कार्यालयको टोलीले नयाँ नागरिकता लिनेहरुको फोटो सहितको मतदाता नामावली संकलन गर्ने छ । नागरिकता भएर पनि यस अगाडि कसैको नाम फोटो सहितको मतदाता नामावलीमा दर्ता नगराएको भएमा त्यसरी छुट भएकाहरुको पनि नामावली दर्ता गरिने जिल्ला निर्वाचन कार्यालय पर्वतका प्रमुख लक्षु शर्माले जानकारी दिनुभयो । यस अगाडि प्रशासनको टोलीले फलेवास नगरपालिका २ थापाठानामा पुगेर यस्तै शिविर संचालन गरेको थियो ।

प्रतिक्रिया

सम्बन्धित समाचार

© 2021 लोकतन्त्र अनलाईन All right reserved
Site By : Softnagari
error: Content is protected !!