पर्वत, १२ असोज ः पर्वतको फलेवास नगरपालिका वडा नं. १ कार्किनेटाका आमाछोरी विगत पाँच दिनदेखि सम्पर्क बिहीन भएका छन् ।

घर पोत्ने रातो माटो खन्न भन्दै गत मंगलवार साँझ साढे ५ बजे घरवाट निस्किएका ३२ वर्षिया गंगा पौडेल र ८ वर्षिया दिपिका पौडेल वेपत्ता भएका हुन् । स्थानीय कार्कीनेटा बजारमा गंगा बिजुली पसल संचालन गर्दै आएका श्रीमान दिपक शर्मा वायरिङ गर्न गाउँतर्फ गएका बेला उनिहरु घर पोत्ने माटो खन्नका लागि भिरमुनि भन्ने ठाउँमा गएका थिए ।

अबेरसम्म घर नफर्किएपछि आफन्त, इष्टमित्र मिलेर उनिहरु गएको ठाउँतर्फ तथा अन्य ठाउँहरुमा पनि खोजी कार्य तीब्र पारिएको छ । अहिलेसम्म कँहिकतै फेला नपरेको वेपत्ता गंगाका श्रीमान दिपक शर्माले जानकारी दिनुभयो । घरमा कुनै कलझगडा, वेमेल समेत भएको थिएन, शर्माले भन्नुभयो-‘के कारणले घर नफर्किएका हुन् भन्ने पत्ता लगाउँदै सकिएन ।’ ‘केहि दिन अघि श्रीमती गंगाको नागरिकता हराएको र खोजी गर्ने वा नयाँ बनाउने बिषयमा सामान्य छलफल भने भएको थियो अरु कुनै मनमुटाव थिएन’ दिपकले भन्नुभयो ।

वेपत्ता आमाछोरीको खोजीका लागि प्रहरीमा उजुरी दिनुका साथै सवै संयन्त्रहरु प्रयोग गरिएपनि उनिहरु सम्पर्कमा नआएको शर्माले बताउनुभयो । यता जिल्ला प्रहरी कार्यालय पर्वतकले वेपत्ता आमाछोरीको हुलियासहित खोजी कार्य भैरहेको जनाएको छ । प्रहरीका सवै युनिटहरुमार्फत प्रहरी परिचालन गरेर खोजी कार्य भैरहेको प्रहरीको भनाई छ ।

वेपत्ता शर्माको परिवार र माईती पक्षलले जहाँ जुन अवस्थामा भएपनि सम्पर्कमा आईदिन अपिल गरेको छ । साथै खोजी कार्यमा सवैलाई सहयोग गरिदिन समेत आग्रह गरेको छ ।