पर्वतका दुई सडक कालोपत्रेका लागि थप ८ करोड २८ लाख विनियोजन - News site from Nepal

पर्वत-  चालु आर्थिक बर्षमा कार्यान्वयन हुने गरी संघिय सरकारले पर्वतका दुई महत्वपूर्ण सडकका लागि ८ करोड २८ लाख रुपैंया विनियोजन गरेको छ । संघिय सरकारले पूर्वाधार क्षेत्र विकास कार्यक्रम अन्तर्गत फलेवास नगरपालिको एउटा र पैयू तथा विहादी गाउँपालिका जोड्ने अर्को सडकका लागि गरी कुल ८ करोड २८ लाख रुपैया विनियोजन गरेको छ । समपुरक कोष मार्फत प्रदेश र स्थानीय तहले निर्माण गर्न नसक्ने सडकहरुका लागि संघको तर्फबाट बजेट विनियोजन गरिएको  छ ।

कार्यक्रम अन्र्र्तगत फलेवास नगरपालिकाको लमायखोला–लिमिठाना–ठानामौला–भगरा–थापाठाना सडक कालोपत्रेका लागि १ करोड ९८ लाख रुपैंया विनियोजन भएको छ । नगरपालिकाले समेत आफ्नो गुरुयोजनामा राखेको उक्त सडक कालोपत्रेका लागि संघिय सरकारले रकम विनियोजन गरेको फलेवास नगरपालिकाका प्रमुख पदमपाणी शर्माले जानकारी दिए ।

उता, पैयू हुँदै विहादी जोड्ने महत्वपूर्ण सडक चिसापानी–हातेमालो चोक–त्रिवेणी–वहाकी भञ्जाङ–पोखरा चौर खहरेखोला सडकका लागि ६ करोड ३० लाख रुपैया विनियोजन भएको शर्माले जानकारी दिए । यस अघि सडक कालोपत्रेको लागि प्रदेश सरकारले चिसापानी देखि हुवास हुँदै वहाकीसम्मको काम शुरु गरीसकेको छ । समपुरक कोष मार्फत प्राप्त रकमले बाँकी खण्डको समेत काम सम्पन्न गरी कालोपत्रेको काम यसै बर्ष सकिने गरी बजेट विनियोजन गरिएको शर्माले जानकारी दिए । उक्त सडक पैयू र विहादीको प्रमुख सडक हो ।

यसैगरी संघिय सरकारले विशेष अनुदान मार्फत कार्यान्वयन गर्नका लागि फलेवास नगरपालिकामा जेष्ठ नागरिक स्वास्थ्य सेवा कार्यक्रमका लागि ३५ लाख र आरन सुधार कार्यक्रमका लागि ४० लाख रकम प्राप्त भएको छ ।

प्रतिक्रिया

सम्बन्धित समाचार

© 2021 लोकतन्त्र अनलाईन All right reserved
Site By : Softnagari
error: Content is protected !!